ليشات مختلفة طرت على بالى اللحين وانا قاعد احك راسي 
.
.
.
.
.
.
- ليش الخروف بالكويت يقدرونة تمام واخرهم الخروف المزيون (25 الف دينار ) في وقت كثيرين من البشر مالهم تقدير ؟
- ليش بالكويت قيمة الاراضي السكنية اغلى من اغلى قيمة اراضي سكنية بالعالم اذا مو الاغلى , لدرجة صار معاها شارع الشانزليزية بباريس بمبانية وعمرانيتة اقل قيمة بكثير من شارع الحب والعماير المحوطتة .
- ليش استاد رياضي واحد بسيط اخذ سبع سنوات ونص , يعني اطول من سنين القحط اللى صارت بعهد سيدنا يوسف علية السلام في وقت بنت جنوب افريقيا مدينة رياضية كاملة وتحديث وتطوير لثمان استادات من الطراز الرفيع بنص هالمدة تقريبا.
- ليش بس الكويت يطالبون بتطيييييح القروض وسوها قضية القضايا, مع ان الواحد منهم ماكان مطقوق على راسة ولا مجبور انة ياخذ غرض يبهدل فيه عمرة ؟
- ليش بس بالكويت الواحد اول مايخلص الثانوية ويقول اصبحنا واصبح الملك لله واول مايشتغل ويمسك معاش يكود على عمرة قرض بعشرين ولا بثلاثين الف دينار عشان يشتري سيارة سبورت يكشخ فيها ويتم يسدد بقرضها سنين من عمرة ؟
- ليش بس بالكويت عقوبة اللى يبوق بلاك شحن لموبايل مثل عقوبة اللى يبوق تسع ملايين دينار , واخرهم خاجة بيك ؟
- ليش بس بالكويت عدد اللى يهايطون ومافي بمخابيهم دينار اكثر من عدد السكان ؟
- ليش اغلب المشاريع التجارية المحدودة بالكويت ياتكون مطعم او بقالة او محل هواتف ؟
- ليش بالكويت المعظم يعرفون كل شي وخبراء بكل شي ولما تسالة اي سوال باى مجال من علم الذرة الى علم عمل الجاى المخدر مايتعطل بالجواب ؟
- ليش بس بالكويت تصرف مليارات الدولارات لمساعدة دول باخر العالم بوقت تفتقر الديرة لمشروع واحد حيوي كبير !! وبوقت يعيش فيها البعض ببيوت من الجينكو والصفيح حالهم حال بنغلادش قبل ؟
- ليش بس بالكويت اغلب المطاوعه حافظين الاغاني الحديثة ومتابعين ممتازين للمسلسلات والافلام العربية والعالمية وان تحجوا قالو صدفة وجزاك الله خير ؟
- ليش بس بالكويت اكو فئة مو قليلة تعتبر القهوة او الشيشة بيت اول واخير’ ويشوفون فيها راعي الولعه اكثر من مايشوفون اهاليهم ؟
- ليش بس بالكويت الهبه تطلع بسرعه وتختفى بسرعه واخرها هبة الشوارفسكي و تي سيرتات البولو و المضاعد الملونة ؟
- ليش بس بالكويت اللى ماعندة بلاك بيري يعتبر انسان ناقص مو طبيعي وفيه شيء ؟
- ليش بس بالكويت اللى يتعشون من ماكدونالدز اكثر من اللى يتعشون ببيوتهم ؟
- ليش هاللى يتعشون يكملون فرارتهم بشارع الحب او بالافنيوز بعد مايخلصون عشاهم ؟
- ليش بس بالكويت ( الغالب ) بكل قطعه من القطع تحصل مسجد شكبرة ولما تدخل تصلى يادوب المصلين يكملون صف واحد ؟
- ليش يطلع واحد على التلفزيون امس انولد و فية شبة من رونالدينهو يعلمنا دينا وشلون نتواصل مع الله سبحانة ؟
- ليش بس بالكويت يتم عقد ندوة دينية بوسط سوق يكون فيه المغازل والقز مالة والى والضيق والقصير والسبايكي والجل حاظرين فيه بقوة ؟
- ليش بس بالكويت يتم في الغالب تقدير المتردية والنطيحة وما اكل السبع والنذل والجبان واللى يرقص بعرس اختة في وقت يتم فية تهميش العقليات والكفاءات والخبرات المميزة اللى بيدها تخلى الديرة دانة الخليج من يد ويديد ؟
- ليش بس بالكويت الاعلام الهابط ممكن يتحكم بجمهور عريض من الناس يفرض عليهم اى قضية تافهه ويلهيهم فيها وفي الحجي والاخذ والرد منها لدرجة صارت فيها قنوات فقيرة مثل سكوب و السور مثل السي ان ان وال بي بي سي ولدرجة صار فيها اشخاص مضحكين مثل سوبرمان سكوب او باتمان الوطن او سبايدر مان السور اكثر تاثير وحظور من لاري كينغ واوبرا وينفري ؟
- ليش بس بالكويت الطماط اغلي من الكافيار ؟ وليتر الماى اغلى من ليتر البانزين ؟
- ليش معظم الجمعيات التعاونية حالها حال معظم الشركات والمؤسسات يكون فيها الحظور لمن يدهن السير اكثر والبوق مالة والى ؟ وليش زيادة (صفر على اليمين ) الى قيمة فاتورة ثقيلة يكون امر عادي ومايلاقي اى مراجعة او محاسبة او تدقيق ؟ ليش المحاسبين اهم اللى يطوفون مثل هالصفر ؟
- ليش بس بالكويت اللى يسوق دبابة بثقة يخاف يسوق سيارتة ؟ واللى استحق اوسمة وكتب شكر اميرية ورئاسية مازال مضطهد ومهمش ؟ وليش يتعجبون من شخص حرموة من التعليم والعمل الشريف والحياة اذا سوا جريمة ؟ ليش ها
- ليش المذنبين المساكين من البنغالية والفلبن يشرشحونهم بالجرايد ويفضحونهم على جريمة تافهه ارتكبوها بوقت يخلون الحرامية الصجيين اهل المليارات والملايين ويتسترون عليهم ؟
- ليش لجان المساعدات مثل بيت الزكاة وغيره يفرضون شروط صعبه وشبة تعجيزية لاهل الداخل بوقت تنثر فلوس المساعدات لناس برا الديرة او بمشاريع وصفقات فيها من الشبهه شي كبير ؟
- ليش معظم الحريم بالكويت مايطبخون وان طبخوا وبدعوا يابيض طماط يابيض عيون ؟
- ليش تطلع بين مدة ومدة حملات مضحكة وما اعتقد ان لها قيمة الا خلق ميزانية يستفيد منها البعض مثل حملة غراس الموجهه ضد المخدرات ومادري صراحة المدمن ان شاف الاعلان بيتوب يعني !! او مثل حملة ترشيد اللى بعد ماطلعت اتضح ان الاستهلاك العام للطاقة والماى زاد اكثر من اي وقت سابق ؟ ليش الحملات تاتي بنتيجة عكسية دايما في الكويت فقط ؟
- ليش حسين بن عاقول اختار جميع المشارع وماقتنع بمشروع الباجة بدرب الزلق ؟
- ليش كتبت الموضوع هذا بدال لا احط راسي وانام خصوصا ان وراي شغل بعد شوي ؟
No comments:
Post a Comment