يتابع الان رواد ديوانية (العكيد بو حسن) الاحداث العظيمة (مو عظيمة وايد نص ونص) التى تشهدها ساحة الارادة ::::
بو حسن : اووخ هذا ياي الساحة ويياه اهله !! شوف شوف الحريم ... بياااااااااض الله ويهاااا
واحد حلو : اى الله يعطية العافية .. خل الاهل يستانسون خو الجو بدا يتعدل , وبرااااد و خوش طماشة !!
حمد : يقولون خمستالاف واحد اللى متظاهرين بساحة الارادة ....
:::: :: مرت وحدة فاله الشعر جدام كاميرة التلفزيون :::: :::
عزيز : يالله تبون شي بروح الساحة , بلحق عليهم .......
بو حسن : اقول اقعد اقعد , والله العظيم يقطونها براسك من بين كل هالعالم , يخلون الخمستالاف يمشون ويقطون السالفة براسك وانت البدون الوحيد بينهم ....
واحد حلو : عاد يقولون باجر بالاخبار خمسة الاف مواطن و واحد بدون ...
الحجي مو هني , الحلو يقولك مخفر الصليبية و مخفر تيماء مقلوبين اليوم , في اخبار ان البدون يبي يسون مظاهرة ومستنفرين مخافرهم على هالمقاريد , وقوات خاصة ومدرعات وشرطة على بالك ان الحرب قامت , بالاخير محد طلع ......
بو حسن : ياريال بعد جووهم المرة الاولى بالقنابل و المطاعات .. اهي دعوة بالفيس بوك تلاقي واحد قلبة مورم طلعها وصار فيهم جذي , شلون لو صج !! شراح يطلعونلهم وشراح يحشدونلهم. ما ستبعد والله دبابات وراجمات صواريخ , والله المفروض يحسون ويعطونهم حقوقهم بدون اى تعقيدات ولا هالاذية كل يوم ...
حمد : عندي واحد من الربع توة راد من كندا يقول بأول ايامي اول ماوصلت كندا شافني شرطي , يقول جان والله سوالف انا وياه فبعد ماعرف انى بدون قالى تدري شنو اسوء حكومتين في العالم ... قلتلة شنو , قال الاولى الحكومة الاسرائيلية لأنها طردت الفلسطينين وخذت ارضهم ومو راضية تعترف فيهم والثانية لان فيها ناس اصلين من خمسين سنة مو راضية تعترف فيهم ...
عزيز : بدا بدا , زين , عاد الثانية ماعرفناها ....
حمد : ماني قايلك الثانية مني , اخاف بعد حاطلى جهاز تنصت بجيبك , الثانية اهي حكومة جزر القمر .. ارتحت .
عزيز : اى على بالى بتقول شي بعد ....
بو حسن : ياجماعه خلونا من سالفة هالمقاريد البدون .. خلونا من هالسالفة وشوفو سالفة فزعة النواب , اللى مسويلي نفسة مثل الانسة خضرة الشريفة واللى قام يبجي مثل سعود الورع واهم اكبر حرامية .......
واحد حلو : عمي شلون حرامية ؟ اللى فضحوهم بس سبع نواب , ومابينهم احد من هالنواب ...
بو حسن : وانت على بالك ماكو حرامية الا بهالسالفة بس , والله يخوي شوف انا ما اشك ابدا انهم كلهم نوع واحد ومن فصيلة وحدة , اللى يفرق بينهم اشكالهم الخارجية فقط لاغير , اللى ماحصلة شيك تلاقية قبض كاش , واللى ماقبض كاش تلاقيهم دخلوة بصفقة ولا بمناقصة وخلوة يترزق من وراها , والدليل ان كل النواب بدون استثناء داشين بمناقصات و صفقات الله اعلم اذا كانت سليمة او مشبوهه بس انهم داشين في النهاية .....
واحد حلو : والله هم نظريتك معقولة .. بس عمي شمعنى اللحين طلعت هالاخبار وينهم من زمان عن الفضايح والرشاوي شنو توهم يدرون ..
بو حسن : لايخوي يدرون فيهم من زمان وعندهم مستمسكات عليهم , بس تقدر تقول اهي لعبه سياسية كبيرة , مايبون الحكومة , وهم في حسب حجي هالمواقع والجرايد اكو صراع خفي بين الحيتان ... والله بيني وبينكم انا اللى اشوفة انة فسق وبطر وناس عايشة بنعمة و مو مقدرتها , وربي خوفك يجينا يوم تزول فيه هالنعمة بسببهم وبسبة تفاهاتهم ,, يبي يقلدون مصر يبي يقلدون سوريا ومو عارفين شلون
عزيز : جيكو جيكو ...شرايكم فيها ؟
واحد حلو : والله بصراحة .. زبد , ودي اروح بس اخاف صراحة
.
.
No comments:
Post a Comment